వ్యాపం: ఒకరి తరువాత మరొకరు చనిపోయిన ఈ కుంభకోణం ఏంటి?

ఇందోర్‌లోని మహాత్మా గాంధీ మెడికల్ కాలేజీలో చదువుతున్న 19 ఏళ్ల నమ్రతా దామోర్ జనవరి 2012లో ఒక రోజు ఉదయం అదృశ్యమైంది. జనవరి 7, 2012న ఆమె మృతదేహాన్ని ఉజ్జయిని రైల్వే ట్రాక్ వద్ద కనిపించింది. ఊపిరాడక మృతి చెందినట్లు పోస్టుమార్టం నివేదికలో పేర్కొన్నారు. దీంతో ఆమె మరణాన్ని హత్యగా నమోదు చేశారు.

తొలుత ఆమె పెదవులపై గాయాలతోపాటు, కొన్ని పళ్లు ఊడిపోయినట్లు రాశారు. కానీ పోలీసులు ఆ పోస్ట్‌మార్టం నివేదికను తిరస్కరించి, రెండవసారి పోస్ట్‌మార్టం నిర్వహించారు. ఆ తరువాత ఆమె మరణాన్ని ఆత్మహత్యగా రికార్డ్ చేశారు.

ఇది జరిగిన మూడేళ్ల తర్వాత ప్రముఖ మీడియా సంస్థకు చెందిన అక్షయ్ సింగ్ అనే జర్నలిస్ట్ నమ్రత తండ్రిని ఇంటర్వ్యూ చేసేందుకు వెళ్లారు. కానీ ఇంటర్వ్యూను రికార్డ్ చేయడానికి ముందే అతను దగ్గుతూ నోట నురుగలు కక్కుకుంటూ చనిపోయారు.

మధ్యప్రదేశ్‌లోని ఝబువా జిల్లాలో ఉన్న నమ్రత తండ్రి మెహతాబ్ సింగ్ దామోర్ ఇంటికి అక్షయ్ సింగ్ చేరుకున్నారు. 2012లో మెహతాబ్ సింగ్ కుమార్తె నమ్రతా దామోర్ అనుమానాస్పద మృతిపై ఆయన మాట్లాడాలనుకున్నారు. తండ్రి మెహతాబ్ సింగ్ కూడా మాట్లాడేందుకు సిద్ధమయ్యారు. ఇద్దరూ ముఖాముఖిగా కూర్చున్నారు. మెహతాబ్ సింగ్ తన పిటిషన్ల ఫోటోకాపీలు, కోర్టు నిర్ణయాన్ని ముందు కూర్చున్న అక్షయ్ సింగ్‌కు అందజేశారు. టీ వచ్చింది. అక్షయ్ సింగ్ టీ తాగగానే ముఖం బిగుసుకుపోయి పెదవులపై నురగతో నేలపై పడిపోయాడు.

అక్షయ్ సింగ్‌ను మెహతాబ్ సింగ్ దామోర్ ఇంటికి తీసుకెళ్లిన ఇందోర్‌కు చెందిన స్థానిక జర్నలిస్ట్ రాహుల్ కరియా ఈ వివరాలు చెప్పారు. "మేము అతన్ని నేలపై పడుకోబెట్టాం. అతని బట్టలు విప్పి, అతని ముఖం మీద నీరు చల్లాం. అతని పల్స్ చెక్ చేస్తే చనిపోయినట్లు అనిపించింది" అని రాహుల్ కరియా అన్నారు.
వెంటనే అతడిని సివిల్‌ ఆసుపత్రికి, ఆ తరువాత ప్రైవేట్‌ ఆసుపత్రికి తరలించినా వైద్యులు కాపాడలేకపోయారు. పోస్ట్‌మార్టం రిపోర్టు ప్రకారం గుండెపోటుతో చనిపోయాడని, చనిపోయే సమయానికి గుండె పరిమాణం పెరిగిందని తెలిపారు.

ఇది జరిగిన ఒక రోజు తర్వాత, వ్యాపమ్‌లో పాల్గొన్న విద్యార్థుల జాబితాను సిద్ధం చేస్తున్న మధ్యప్రదేశ్ లోని ప్రభుత్వ వైద్య కళాశాల డీన్ దిల్లీలోని ఒక హోటల్‌లో శవమై కనిపించారు.

జబల్‌పూర్ మెడికల్ కాలేజీ డీన్‌గా శర్మ పని చేసేవారు. మధ్యప్రదేశ్‌లోని స్పెషల్ టాస్క్ ఫోర్స్‌కు ఈయన 200కు పైగా డాక్యుమెంట్‌లను సమర్పించారు. పరీక్షల్లో రిగ్గింగ్‌కు పాల్పడిన విద్యార్థుల జాబితాను శర్మ స్వయంగా సిద్ధం చేశారు.

అక్షయ్ మరణించిన ఒక రోజు తర్వాత, దిల్లీలోని అంతర్జాతీయ విమానాశ్రయానికి దగ్గరలో ఉన్న హోటల్ ఉప్పల్‌లో బెడ్ మీద చనిపోయి కనిపించారు. ఆ సమయంలో ఆయన ఇండియన్ మెడికల్ అసోసియేషన్ తరపున తనిఖీ నిర్వహించేందుకు త్రిపుర రాజధాని అగర్తలాకు వెళుతున్నారు. ఆయన ఉన్న గదిలో ఖాళీ మద్యం సీసాను పోలీసులు గుర్తించారు. శర్మ రాత్రిపూట ఎక్కువగా మద్యం సేవించాడని, రాత్రి వాంతులు కూడా చేసుకున్నారని తేలింది.

శర్మ మృతికి సహజ కారణాలేనంటూ ఈ కేసును విచారిస్తున్న అధికారి విచారణను ముగించారు. ఇలా అనుమానాస్పద స్థితిలో మృతి చెందిన మెడికల్ కాలేజ్ డీన్లలో శర్మ రెండో వ్యక్తి. అంతకు ముందు ఏడాది కిందట జబల్‌పూర్ మెడికల్ కాలేజీకి చెందిన మరో డీన్ తన ఇంటి వెనుక ఉన్న తోటలో ఆత్మహత్య చేసుకున్నారు.

జబల్‌పూర్ మెడికల్ కాలేజీ డీన్‌గా డాక్టర్ డీకే షాకలే ఉండేవారు. వ్యాపమ్‌ మీద దర్యాప్తు చేస్తున్న కళాశాల అంతర్గత విచారణ కమిటీకి ఇన్‌చార్జ్‌గా కూడా ఉన్నారు. ఉదయం 8.45 గంటలకు ఆయన భార్య వాకింగ్‌కు వెళ్లిన సమయంలో మంటల్లో కాలిపోతూ ఇంటి నుంచి బయటకు వస్తూ డీకే షాకలే కనిపించారు.

ఇది ఆత్మహత్య అని, ఆయన మరణం అనుమానాస్పదం కాదని పోలీసులు ప్రకటించారు. అయితే, ఆ నివేదికను డీకే అనుచరులు కొంతమంది ఒప్పుకోలేదు. ఆయన మరణం ఆత్మహత్య కాదని, దాని మీద సీబీఐతో దర్యాప్తు చేయించాలని డిమాండ్ చేశారు.

మధ్యప్రదేశ్‌లోని ఝాన్సీ కాలేజీలో బ్యాచిలర్ ఆఫ్ ఆయుర్వేద మెడిసిన్ అండ్ సర్జరీ (BAMS) చేశారు నరేంద్ర రాజ్‌పుత్. ఆ తరువాత సొంత ఊరైన హర్పాల్‌పుర్‌కు వచ్చి క్లినిక్ ప్రారంభించారు. ఆ తరువాత ఆరు నెలలకు ఆయన చనిపోయారు.

ఏప్రిల్ 13, 2014న పొలంలో పని చేస్తున్నప్పుడు హఠాత్తుగా గుండెలో నొప్పి వస్తోందని నరేంద్ర చెప్పారు. వెంటనే ఇంటికి బయలుదేరిన ఆయన, ఇంటి ముందే కుప్పకూలారు. పోస్టుమార్టం రిపోర్టులో ఆయన మరణానికి స్పష్టమైన కారణం తెలియలేదు. తరువాత ఆయన కుటుంబ సభ్యులు ప్రభుత్వ రైతు బీమా పథకం కింద బీమా ప్రయోజనాల కోసం దరఖాస్తు చేసుకున్నారు. అయితే మరణానికి గల కారణాలను పోస్ట్‌మార్టం నివేదిక వెల్లడించకపోవడంతో కుటుంబ సభ్యులకు బీమా ప్రయోజనాలు అందలేదు.

నరేంద్ర మృతి చెందిన కొన్ని నెలల తర్వాత పోలీసులు వ్యాపమ్ స్కామ్‌లో ఆయన మధ్యవర్తిగా ఉన్న విషయాన్ని కుటుంబ సభ్యులకు తెలిపారు. ఆయన మీద కేసు నమోదైనట్లుగా చెప్పారని బంధువులు తెలిపారు.