வியாபம்: இந்திய தேர்வு முறைகேடு தொடர்பான சந்தேக மரணங்கள்

இந்தூரில் உள்ள மகாத்மா காந்தி மருத்துவக் கல்லூரியில் மருத்துவ அறிவியல் படித்துவந்த 19 வயது மாணவி நம்ரதா தாமோர், ஜனவரி 2012 தொடக்கத்தில் காணாமல் போனார். துரதிர்ஷ்டவசமாக, ஜனவரி 7 ஆம் தேதி இரவு, உஜ்ஜயினி அருகே ரயில் தண்டவாளத்தின் அருகே அவரது உடல் கண்டுடெடுக்கப்பட்டது.

அவர் மூச்சுத்திணறலுக்கு ஆளானார் எனவும், குறிப்பாக வன்முறையின் விளைவாக ஏற்பட்ட மூச்சுத்திணறலுக்கு ஆளானார் என்றும் ஆரம்பநிலை பிரேத பரிசோதனை அறிக்கையில் தெரிவிக்கப்பட்டிருந்தது. இது மாணவியின் மரணத்தை ஒரு கொலை என்று வகைப்படுத்த வழிவகுத்தது.

மேலும், மாணவியின் உதடுகளில் சிராய்ப்பு இருந்தது குறித்தும், சில பற்கள் இல்லாதது பற்றியும் முதல் பிரேத பரிசோதனை அறிக்கையில் குறிப்பிடப்பட்டிருந்தது. ஆனால், அந்த அறிக்கையில் தெரிவிக்கப்பட்டிருந்த விஷயங்களை போலீசார் நிராகரித்தனர். அத்துடன், இரண்டாவது பிரேத பரிசோதனை அறிக்கையின் அடிப்படையில், மாணவியின் மரணம் தற்கொலை என்று முடிவு செய்யப்பட்டது.

இந்த சம்பவம் நிகழ்ந்து மூன்றாண்டுகளுக்குப் பிறகு, ஒரு முன்னணி செய்தி நிறுவனத்தின் பத்திரிகையாளர் அக்ஷய் சிங், மாணவியின் மரணம் குறித்த விசாரணையைத் தொடர்ந்து, அவரது தந்தையைப் பேட்டிக் காணச் சென்றார். ஆனால் நேர்காணலைப் பதிவு செய்வதற்கு முன் அவருக்கு இருமல் வந்ததுடன், வாயில் நுரை வரத் தொடங்கியது.

மருத்துவக் கல்லூரி மாணவி நம்ரதா தாமோர் 2012 இல் மர்மமான முறையில் இறந்ததைத் தொடர்ந்து, மத்தியப் பிரதேசம், ஜபுவாவில் உள்ள மாணவியின் தந்தை மெஹ்தாப் சிங் தாமோரின் வீட்டுக்கு பத்திரிகையாளர் சிங் சென்றார். தனது மகளின் மரணம் குறித்து பத்திரிக்கையாளரிடம் பேச அவரது தந்தை ஒப்புக்கொண்டார்.

அத்துடன் தன் மகளின் மரணம் தொடர்பான புகார் மனுக்கள், காவல்துறை மற்றும் நீதிமன்ற அறிக்கைகளின் நகல்களை அவர் சிங்கிடம் பகிர்ந்துக் கொண்டார். அவருக்கு தேநீர் வழங்கப்பட்டது. சிங் தேநீரைப் பருகிக் கொண்டிருந்தபோதே அவரது முகம் உறைந்து, வாயில் இருந்து நுரை வழிய தரையில் மயங்கி விழுந்தார்.

"நாங்கள் அவரது ஆடைகளை அவிழ்த்து, முகத்தில் தண்ணீர் தெளித்தோம். அவரது நாடித்துடிப்பைச் சரிபார்த்தேன். அப்போதே அக்ஷய் சிங் இறந்துவிட்டார் என்பது எனக்கு தெரிந்துவிட்டது" என்று பத்திரிகையாளர் சிங்கை, தாமோரின் வீட்டுக்கு அழைத்துச் சென்ற இந்தூரைச் சேர்ந்த பத்திரிகையாளர் ராகுல் காரியா, அந்தச் சம்பவத்தை நினைவு கூர்ந்தார்.

இருப்பினும் அவர் முதலில் அரசு மருத்துவமனைக்கும், பின்னர் தனியார் மருத்துவமனைக்கும் கொண்டு செல்லப்பட்டார். ஆனால் அவரது உயிரை மருத்துவர்களால் காப்பாற்ற முடியவில்லை. அவர் மாரடைப்பால் இறந்தார் என்றும், இறந்த நேரத்தில் அவரது இதயத்தின் அளவு பெரிதாக இருந்தது எனவும் பிரேத பரிசோதனை அறிக்கையில் குறிப்பிடப்பட்டிருந்தது.

பத்திரிகையாளரின் மரண சம்பவம் நிகழ்ந்த ஒரு நாள் கழித்து, மத்தியப் பிரதேசத்தைச் சேர்ந்த ஓர் அரசு மருத்துவக் கல்லூரியின் டீன், புதுதில்லியில் ஓர் ஹோட்டலில் இறந்து கிடந்தார். வியாபம் முறைகேட்டில் ஈடுபட்ட மாணவர்களின் பட்டியலை ஒன்றிணைப்பதாக அவர் கூறியிருந்தார்.

ஜபல்பூர் மருத்துவக் கல்லூரியின் டீனாக இருந்த சர்மா, மத்தியப் பிரதேச சிறப்பு அதிரடிப் படையிடம் (STF) 200 ஆவணங்களைச் சமர்பித்திருந்ததாகக் கூறப்பட்டது. தேர்வு முறைகேட்டில் ஈடுபட்டதாக கூறப்பட்ட மாணவர்களின் பெயர் பட்டியலை அவர் ஒருங்கிணைத்திருந்தார்.

அக்ஷய் இறந்த ஒருநாள் கழித்து, டெல்லியின் சர்வதேச விமான நிலையத்துக்கு அருகிலுள்ள ஹோட்டல் உப்பலில், தனது படுக்கையில் சர்மா இறந்து கிடந்தார்.

இந்திய மருத்துவ சங்கம் சார்பில் நடைபெறவிருந்த ஒர் ஆய்வுக்காக அவர், திரிபுரா தலைநகர் அகர்தலாவுக்குச் சென்று கொண்டிருந்தார். போகும் வழியில் டெல்லியில் தங்கியபோது அவருக்கு அப்படியொரு சோகமான முடிவு நேர்ந்தது.

அவர் இறந்து கிடந்த அறையில் கிட்டத்தட்ட காலியான மதுபாட்டிலை போலீசார் கண்டெடுத்தனர். சர்மா அதிகமாக குடித்துவிட்டு இரவில் வாந்தி எடுத்தார். மேலும், “இயற்கையான காரணங்களால்” அவர் இறந்துவிட்டார் என்று விசாரணைக்கு நெருக்கமான அதிகாரிகள் தெரிவித்தனர்.

தற்செயலாக, மர்மமான சூழ்நிலையில் இறந்த மருத்துவக் கல்லூரியின் இரண்டாவது டீன் சர்மா ஆவார். ஒராண்டுக்கு முன், ஜபல்பூர் மருத்துவக் கல்லூரியின் மற்றொரு டீன் தனது வீட்டு தோட்டத்தில் தீக்குளித்து தறகொலை செய்து கொண்டார்.

ஜபல்பூர் மருத்துவக் கல்லூரியின் அப்போதைய டீன் டாக்டர் டி.கே., வியாபம் ஊழல் குறித்து கல்லூரியில் நடைபெற்றுவந்த நிர்வாகரீதியான விசாரணைக்கு பொறுப்பாளராக இருந்தார்.

குறிப்பிட்ட நாள் காலை 8:45 மணியளவில் அவர், தீப்பற்றிய உடம்புடன் அலறியடித்தபடி தனது வீட்டிலிருந்து வெளியே ஓடிக்கொண்டிருந்தார். அப்போது டி.கே.,வின் மனைவி நடைபயிற்சிக்கு சென்றிருந்தார்.

அவரது மரணத்தில் சந்தேகத்திற்குரிய வகையிலான ஆதாரங்கள் எதுவும் கிடைக்கவில்லை என்றும், அவர் தற்கொலை செய்து கொண்டார எனவும் போலீசார பின்னர் தெரிவித்தனர்.

இருப்பினும், வியாபம் ஊழலில் உண்மையை வெளிகொண்டுவர போராடிக் கொண்டிருந்த தன்னார்வலர்கள் (whistleblowers), டாக்டர் டி.கே., மரணத்தை தற்கொலை என்று ஒரே வார்த்தையில் கூறி கடந்துவிட முடியாது எனவும், அவரது அசாதாரண மரணம் குறித்து மத்திய புலனாய்வுக் குழு விசாரணை மேற்கொள்ள வேண்டும் என்றும் வலியுறுத்தினர்.

ஜான்சி கல்லூரியில் இளங்கலை ஆயுர்வேத மருத்துவம் மற்றும் அறுவை சிகிச்சை (BAMS) பட்டம் பெற்ற நரேந்திர ராஜ்புத், ஏப்ரல் 13, 2014 அன்று அகால மரணம் அடைந்தார். அவர் மரணித்ததற்கு ஆறு மாதங்களுக்கு முன்பு, தனது சொந்த கிராமத்திற்குத் திரும்பிய அவர், ஹர்பால்பூரில் ஒரு சிகிச்சை மையத்தை தொடங்கினார்.

ஏப்ரல் 13, 2014 அன்று, வயல்வெளியில் வேலை செய்து கொண்டிருந்தபோது ராஜ்புத், தமக்கு நெஞ்சு வலிப்பதாக கூறிவிட்டு வீட்டுக்கு திரும்பினார். ஆனால் வீட்டு வாசலிலேயே அவர் சரிந்து விழுந்தார்.

அவரது மரணத்துக்கான தெளிவான காரணம், பிரேத பரிசோதனை அறிக்கையில் தெரிவிக்கப்படவில்லை. இதன் விளைவாக,, விவசாயிகளுக்கான அரசின் காப்பீட்டு திட்டத்தின்கீழ் அவரது குடும்பத்தினர் கோரியிருந்த இழப்பீடும் அவர்களுக்கு கிடைத்ததாக தெரியவில்லை.

இந்த நிலையில், வியாபம் ஊழலில் நரேந்திர ராஜ்புத் ஒரு “இடைத்தரகராக” செயல்பட்டு வந்தார் என்று அவர் இறந்தபின், சில மாதங்களுக்கு பிறகு போலீசார் அவரது உறவினர் ஒருவரின் வீட்டுக்குச் சென்றபோது கூறினர்.